Subscribe Twitter

2008/10/08

ماشربتش من نيلها ؟؟


السلام عليكم..سبق وإتكلمت معاكم عن بلدنا فى موضوع (هيا بلدنا فيها إيه وحش) الموضوع اللى نقده كتير وإتريق عليا ناس أكتر وقالولى إنتى مش عايشه فى البلد إنتى بتحبى بلدك أوى إيه الوطنيه اللى إنتى فيها دى وإتفقنا مع بعض إننا بنحب بلدنا بس مش بنحب ناس معينه ماسكه مناصب معينه وإننا مش بنحب يبقى فى ناس تحت خط الفقر وناس فوق خط الغنى ... أنا بأقول الكلام ده ليه لأن حصل موقف أتمنى إننا نتناقش فيه مع بعض.. من يومين بالظبط كان ذكرى حرب أكتوبر وعبور القناة وطبعا كانت كل القنوات الأرضيه والفضائيه بتذيع أفلام عن الحرب زى أيام السادات واللى إتعرض على 6 قنوات وفيلم الطريق إلى إيلات وغيرهم وكانت كل الأغانى وطنيه زى ياحبيبتى يا مصر وخللى السلاح صاحى وعاش اللى قال وكده يعنى.. حتى البرامج كانت كلها وطنيه وأنا هنا قصدى على برنامج معين للأسف ماشوفتوش من أوله وكان على قناة مودرن تى فى القناة الفضائيه المصريه والتى يرأسها الممثل تامر عبد المنعم البرنامج كان بيستضيف البطل المصرى أحمد الهوان واللى المصريين يعرفوه بإسم جمعه الشوان ودى مجموعة من صوره عشان اللى مايعرفوش المهم بطلنا المصرى كان بيحكى عن مفامرته داخل الموساد وازاى عرضوا عليه فى الستينات 185 ألف جنيه (تخيلوا المبلغ ده فى الستينات كان معناه ايه كان يشترى مدينه بحالها) غير الهدايا عشان يبقى معاهم والحاجه اللى خليته يروح للمخابرات المصريه ويحكيلها هيا دموع عبد الناصر فى خطاب التنحى وقال ازاى الرئيس يبكى وحياة دموعه دى أنا مش هأتعاون مع أعداؤه وسألته المذيعه إنت حاسس بتكريم من مصر قالها طبعا من المصريين ومش بيقولولى غير يا بطل المهم بطلنا عنده إصابه فى رجله ومابيقدرش يمشى وكمان عنده إصابه فى عينه ومحتاج عملية زرع قرنيه ..وبذكاء المذيعه سألته طب ليه ماطلبتش منهم أنهم يعملولك العمليه على حسابهم (الحدق يفهم) قالها أنا بعت 3 جوابات للمخابرات المصريه وللحكومه المصريه ولرئيس الجمهوريه (لم يحدد أى رئيس ومتى تم ذلك) جاله رد من التليفون وطلبوا منه أنه يجيلهم مجمع التحرير فى يوم معين قالوهم أنا معاق قالوله خلاص هنجيلك لحد البيت قالوهم انتوا مين قالوله الشئون الإجتماعيه وفى اليوم المحدد ذهب للمجمع ولقاهم عاملينله معاش بمبلغ 70 جنيه فقط لاغير ولما لقى ده ردهم عليه كتبلهم تنازل عن المعاش لبناء القوات المسلحه وحاملات طائرات وغيرها من أسلحه للجيش .. ولا تعليق..

ملحوظه : الحلقه تم إذاعتها يوم 6 أكتوبر 2008 معاده فى الساعه 10 مساءا

2 قول رأيك فى اللى قريته:

رجل من غمار الموالى يقول...

السلام عليكم
وبعدين بتقولى نحب مصر
.......
مصر إيه
.... وكلام فاضى إيه

غير معرف يقول...

جميل الكلام دة بس دة كان ايام الوطنية
وعلى العموم انا بشرب من نيلها علشان مفيش حاجة تانية اشرب منها