Subscribe Twitter

2008/10/18

هزى يا نواعم ........


كعادته الإعلام العربى يتحفنا من حين لأخر ببرامج بشعه كان أخرها برنامج يدعى هزى يا نواعم ومن إسم البرنامج تفتكروا هيكون برنامج عن إيه ؟؟ طبعا عن الرقص بس إزاى ؟ أولا البرنامج يعرض على القناه الفضائيه اللبنانيه LBCفى الخميس من كل أسبوع الساعه 8:30 مساءا البرنامج عباره عن مسابقه فى الرقص الشرقى بين عدة فتيات لإختيار أفضل راقصه من خلال لجنه تحكيم ويشرفنا نحن المصريين وجود شخصان مصريان ضمن هذه اللجنه من ضمنهم الراقصه نجوى فؤاد والبرنامج عرضت أول حلقه منه يوم الخميس الماضي وكان هذا الموسم الثانى له فقد سبق وعرض منه موسم فى العام الماضي وفازت بلقب أفضل راقصه فتاة لبنانيه تدعى إستيل والبرنامج يتضمن عدة فتيات ومن أكثر من دوله من بينها لبنان وتونس وروسيا وفرنسا وهنجاريا وأمريكا وجميعهم يعشقون الرقص الشرقي وشاهدوا عدة أفلام مصريه قديمه لعدة راقصات ومن بين الفتيات فتاة قالت بأن نجوى فؤاد مثلها الأعلى (حاجه جميله خالص مش كدا )..

وللعلم لن تكتفى الفضائيه اللبنانيه بهذا البرنامج فقط والذى يستمر تقريبا شهر بل هناك برنامج أخر يدعى MISSION FASHION لإختيار أفضل عارضة أزياء وأفضل مصمم أزياء وبعده يأتى البرنامج الأكثر جدلا STAR ACCADEMY والذى يعشقه ملايين الشباب فى الوطن العربي ...........

والغريب أن البرنامج الواحد يستمر على الأقل شهر ( وأقول على الأقل ) فبرنامج ستار أكاديمى مثلا يستمر 4 شهور يعنى نطلع من برنامج ندخل فى التانى انتوا مش واخدين بالكم ان دى خطه كويسه اوى ومترتبه كمان لأن مفيش برنامجين بيتعرضوا فى نفس الوقت والمواعيد منسقه وكل شئ تمام . يعنى متهيألى يعنى أن البرامج دى كلها ليها هدف معين يعنى مثلا اللى بيحب الموضه هيتفرج على برنامج الموضه واللى بيحب الرقص هيتفرج على برنامج رقص واللى بيحب ستار أكاديمى بكل ما فيه هيتفرج عليه يعنى بصراحه مراعيين ذوق المشاهد وشملوا كل الفئات ......

أنا هاسيبكم أنتم تفكروا فى الهدف من البرامج دى ومين اللى عملها ومين اللى ممولها ومين الراعى بتاعها وهأسهلكم الإجابه خالص لأن الراعى الرسمي والممول الأساسي لبرنامج ستار أكاديمى هى شركة ( بيبسي ) ولا تعليق........

الأكثرمن ذلك . أن لو أى حد وجه اتهام للبرامج دى يقولوا ماهو الشباب هو اللى عاوز كده ويهاجموا الشباب ويقولوا الشباب ضايع ومش عارف طريقه طب ماتعرفونا الطريق فين بدل ما تضيعونا وتسيبونا بنغرق وتقولوا إحنا مالنا .. إعملوا برامج ثقافيه وشوفوا الشباب هيشارك فيها إزاى . إعملوا مسابقه فى الشعر مثلا . أى حاجه . ده البرنامج الوحيد اللى كنا بنستفيد منه هو برنامج ( من سيربح المليون ) وحاليا لا يتم عرضه مع أنه حقق أعلى نسبة مشاهده فى العالم العربي وكان البرنامج العربي الوحيد الذى يجتمع عليه جميع أفراد الأسره ولم يضاهيه فى هذا الوقت سوى برنامج ( رئيس التحرير ) لحمدى قنديل والذى منع من العرض وسافر إلى دبى ويقدم حاليا برنامج أخر يدعى ( قلم رصاص ) أرجو إعادة التفكير فينا .... وعدم إهانتنا ....... وتقديم برامج تليق بنا ... وبعقولنا ..... وفى إنتظار تعليقاتكم

3 قول رأيك فى اللى قريته:

طنطا اوف لاين يقول...

amy4me , يا راجل انت بتعترض على إيه بس , حرام عليك ... ده برنامج تعترض عليه !! ده برنامج مميز جدا وكفاية انه بيدى ريادة لمصر , أيوه مش انت بتقول فيه اثنين من المحكمين مصريين .. دا أنا بعد ما قرأت موضوعك بفكر أشارك فى البرنامج ده حتى .. أكيد فيه نصيب للرجالة يعنى .. وأهو الواحد يقابل قدوتنا نجوى فؤاد .


أقول ايه بس , الواحد خلاص حاسس بالقرف من نوعية البرامج اللى باسمع عنها , بصراحة عايز أرجع .. احنا الاعلام عندنا أصبح هامشى للغاية .. بلد زى لبنان اللى بتحتضن قناة زى دى , المفروض ان كل اللى فيها يتلهوا بالمصائب اللى عمالة ترف على دماغهم ... بصراحة مش عارف , هل انعدم الضمير والحس الوطنى لدى الاعلام اللبنانى ؟؟ أنا كنت بسمع من ناس ان بعض المصريين قرر انه يأجل جوازه بعد النكسة لحد ما ينتصر المصريين ويستردوا كرامتهم .


كل لالى أقدر أقوله ان للأسف الناس دول بيخدروا عقول الشباب ببرامجهم المستورة من الغرب اللى كل شئ عندهم مخالف لينا . وللأسف فيه شباب عربى أهبل وبريالة بيجرى ورا الحاجات دى بالمشوار , ويبعت فى رسائل علشان ده ينجح وينقذوا ده .


كل اللى أقدر أقوله حسبى الله ونعم الوكيل ولا حول ولا قوة إلا بالله ... إن الله لا يغير ما بقوم حتى يغيروا ما بأنفسهم ...شكرا على نقل الخبر .

أسطورة حب يقول...

لينا الفخر ياسلام احنا اللى علمنا العالم الرقص على اصوله وعشقوه على ايدينا

لينا الجنه باذن الله

بدل ما نكون منبع لعلوم الدين

هنقول ايه بس البرامج د ى فعليا مش بتشتغل ولا بيمشي سوقها الا ما بتلاقي تشجيع من التافهين سواء تصويت وتشجيع واس ام اس وغيره

ربنا يهدى الجميع

موضوع هايل يسلموووو

a7med eisa يقول...

تسلم ايدك على الموضوع الرائع ده اولا

بص يا جماعه amy4me جيه على الوتر الحساس نتظر ايه من شباب بعد ما نقدمه هذه التفاهات

فعلا احنا مش شباب ضياع احنا نفس الشباب اللى حاربو فى 6 اكتوبر بل عند الروح اعلى كمان

بدليل برنامج صناع الحياه لـ د / عمرو خالد نشوفنا شباب بجد بعمل عمل خيرى ونظف البلد

وكمان انا اعرف شباب فى جمعيات خيريه مثل جمعيه رساله و غير ها

احنا مش شباب تافه احنا عاوزين توجيه وبس

وعاوزين كمان يبقى قدوتنا نجوى فؤاد

حسبى الله نعم الوكيل