Subscribe Twitter

2010/06/15

فين مبدعين مصر ؟


فى حاجه اسمها القوه البيضاء ، ودى معناها قوة الدوله الغير عسكريه ، يعنى فى اى مجالات أخرى غير الجيش ، زى السينما والأدب والعلم والرياضه وكل ما يبقى للدوله مبدعين اكتر فى اى مجال من دول كل ما كانت الدوله قويه ، بمعنى أخر ، الولايات المتحده الامريكيه الأن - كمثال - ليست قويه بجيوشها فقط بل بالتقدم الهائل فى جميع المجالات السابقه بالإضافه إلى ذلك أن كلما كانت الدوله ذات قوه بيضاء تستطيع أن تنشر معتقداتها وأفكارها ولغاتها ( كما الحال فى السينما الأمريكيه الان فالأفلام الأمريكيه موجوده فى كل دوله بالعالم ويوجد بكل فيلم معتقد أو فكره واحده - على الأقل - عن الحياه الامريكيه ) .
وزماااااان اوى ، من حوالى 50 سنه ، كان مصر ليها قوه بيضاء كبيره جدا ، وممكن أفكركم بكل مجال :

أولا السينما :
كان عندنا إنتاج سينمائى أكبر بكتير من دلوقتى وأفلامنا كانت بتتعرض بره وبتاخد جوايز ( فيلم ام العروسه شارك فى الاوسكار وكان هياخد الاوسكار فعلا لولا تدخل إسرائيلى ) وكان عندنا ممثلين وسينمائيين وصلوا للعالميه زى عمر الشريف ويوسف شاهين وغيرهم كتير كانوا أبطال فى أفلام أجنبيه زى ساميه جمال مثلا ، وكان الفنان الواحد بيعمل كل الادوار يعنى ممكن تلاقى يوسف وهبى بيمثل كوميدى أو عبد المنعم مدبولى يمثل تراجيدى أو محمود المليجى وزكى رستم يعملوا ادوار مافيهاش شر نهائى . كان الممثل بيعمل كل الأدوار ، وكان الممثل بيموت فقير لأنه مش بيمثل عشان الفلوس كان بيمثل عشان بيحب التمثيل ، وكان عندنا أفلام دينيه وأفلام تاريخيه ، كانت من الأخر سينما بمعنى الكلمه .

ثانيا الغناء والطرب :
لا صوت يعلو فوق صوت أم كلثوم وعبد الوهاب وعبد الحليم أهرام الغناء الثلاثه بمصر وكل مطرب فيهم كان بيغنى كل انواع الأغانى سواء عاطفيه أو دينيه أو وطنيه وكمان ممكن تلاقى عبد الوهاب يلحن لام كلثوم او يلحن لعبد الحليم وهو مش حاطط فى دماغه أنهم كده هيتشهروا عنه أو أغانيهم هتبقى احسن منه ، الكل كان بيحب بعض ومفيش غيره ولا حقد ، وطبعا غير محمد فوزى وليلي مراد وشاديه وبليغ حمدى والسنباطى والقصبجى والموجى والطويل ومن قبلهم سيد درويش وغيرهم كتير .

ثالثا مجال الشعر والنثر :
كان عندنا شعراء كتيييير زى صلاح جاهين وحافظ إبراهيم واحمد شوقى وأحمد رامى وإبراهيم ناجى ودول كلهم مش محتاجين اى تعريف منى .

رابعا مجال الادب :
يااااااااه كتير أوى نجيب محفوظ ( اديب نوبل ) واللى رواياته إترجمت لأكتر من 7 لغات حول العالم ، ويوسف السباعى وتوفيق الحكيم وعباس العقاد ويوسف إدريس وطه حسين وإحسان عبد القدوس ( أفضل كاتب يضع أسماء للروايات ) وكانت رواياتهم بتتعمل أفلام اول باول وبيتنافس عليها الممثلين والممثلات ( زى شاديه وفاتن حمامه كانوا دايما فى سباق على تمثيل الرويات ) .

خامسا مجال الرياضه :
كان عندنا الضظوى وهو لمن لا يعرفه تم تكريمه من قبل هتلر ، وهو أول لاعب مصري يحترف خارج مصر ، وكان عندنا الخطيب ( المصري الوحيد الذى حصل على جائزة أفضل لاعب فى أفريقيا حتى الان ) وصالح سليم ( وكان مشهور جدا على مستوى العالم ) ومش بس كرة القدم لا كمان مجالات الرياضه المختلفه زى السباحه مثلا كان عندنا عبد اللطيف أبو هيف .

سادسا المجال العلمى :
أما بقى عن المجال العلمى كان عندنا علماء كتيييير برغم قلة الإمكانيات فى هذا الوقت زى مثلا دكتوره سميره موسي ( واللى قتلها الموساد ) وزى الدكتور مصطفى مشرفه ( اللى نعاه أينشتين وقال لا أصدق ان مشرفه قد مات ) وزى دكتور يحيى المشد ( واللى برضه قتله الموساد ) وزى دكتور مصطفى محمود ( صاحب أفضل برنامج فى تاريخ التليفزيون المصري ) . وكان في بطرس غالى ( الأمين العام للأمم المتحده سابقا ) .

سابعا مجال الدين :
علماء الدين كلهم معروفين زى مثلا الشيخ الفاضل رحمه الله محمد متولى الشعراوى او الشيخ عبد الحليم محمود أو عبد الباسط عبد الصمد ، أو الشيخ محمد رفعت ، أو الشيخ محمد صديق المنشاوى . والإمام محمد عبده .

ثامنا مجال الإقتصاد :
أشهرهم طلعت حرب مؤسس الإقتصاد المصري ( اللى عمل حاجات كتير اوى زى بنك مصر وسينما مصر) ، وكان في برضه عثمان احمد عثمان اللى اهتم بالمهندس المصري ورفع من شأنه .

تاسعا مجال الصحافه :
يووووه مصطفى امين وعلى امين والتابعى وانيس منصور وغيرهم .

أما الان دعونا نتحدث عن كل مجال على حده :

أولا السينما :
عاوز تعمل فيلم ناجح ؟ يبقى تحط فيه الحاجات دى ( مشاهد ساخنه ، مشاهد ضرب وأكشن ، مشاهد هجوم على الدين او الوطن ) يعنى من الأخر أى فيلم من أفلام النهارده لازم يتكلم عن حاجه من الحاجات دى يا إما السياسه يا إما الدين يا إما الجنس . وطبعا ده كله بدون شك مشوه صوره وسمعة مصر فى الخارج . لانى زى ماقولت دى حاجه اسمها قوه بيضاء وقولت تعريفها فى بداية الموضوع .

ثانيا الغناء والطرب :
بلاش نقول طرب لان مفيش طرب لكن هقول حتى الغنا ، مين هو المغنى او المغنيه اللى تحب تسمعه ؟ مين المغنى اللى تحب تدندن بأغانيه دايما ؟؟؟؟؟؟ ده غير ان حال الغنا مايختلفش كتير عن حال السينما لان الجنس فيه بقى فى المقام الاول فى كل الأغانى والكليبات .

ثالثا مجال الشعر والنثر :
سمعت عن شاعر مصري - ماعدا فاروق جويده - ؟ لو سمعت ياريت تبلغنى يمكن انا سمعى تقيل .

رابعا مجال الأدب :
هنقول علاء الأسوانى ( مؤلف عمارة يعقوبيان ) طب في مين غيره تانى ؟

خامسا مجال الرياضه :
مع كل إحترامى وتقديري للمنتخب المصري لكرة القدم وحصوله على 3 بطولات أفريقيه متتاليه نفسي أسأل : ليه مفيش ولا لاعب مصري أحترف فى نادى مشهور عالميا زى دروجبا وإيتو والناس دى ؟ أو بلاش كده ، ازاى مفيش ولا لاعب مصري خد جائزة أفضل لاعب فى أفريقيا ؟ ده بالنسبه لكرة القدم ، لو بصينا لبقية الرياضات انا عن نفسي مبسمعش غير عن إنجازات الإسكواش ، حتى الميداليه الذهبيه فى الاولمبياد فين صاحبها دلوقتى ؟؟؟

سادسا المجال العلمى :
طبعا فى احمد زويل صاحب نوبل ( بس ياترى لو ماكنش خد نوبل كنا سمعنا عنه ولا عرفناه ؟؟ ) وطبعا فى فاروق الباز ودكتور مصطفى السيد ومجدى يعقوب بس دول كلهم إتشهروا خاااااارج القطر المصري ، وهل يعقل لدوله تعداداها 80 مليون يكون فيها هذا العدد الضئيل جدا جدا من العلماء ؟؟؟

سابعا مجال الدين :
هو ده المجال اللى يفرح بجد ، لسه عندنا علماء كتير زى عمرو خالد ومصطفى حسنى ومعز مسعود ودكتوره عبله الكحلاوى ودكتوره سعاد صالح ودكتوره ملكه زرار والشيخ محمد حسان ومحمود المصري ومحمد حسين يعقوب ويوسف القرضاوى ( على الرغم من ان المجال الدينى يتم محاربته بطرق عديده إلا أنه المجال المشرف الأن سبحان الله ) .

ثامنا مجال الإقتصاد :
مين اللى نقدر نقول عليه ( منشط الإقتصاد المصري ) ؟ أنا معرفش غير احمد بهجت نتيجه للخدمات اللى عاملها والشركات الجميله بتاعته عشان يعمل إنتاج مصري وقنواته الفضائيه ومدينة دريم بارك واللى بيجيلها أجانب كتير .

تاسعا مجال الصحافه :
مين الصحفى المصري اللى بتحب تقراله ؟ وبيعجبك مقالاته ؟

وفى النهايه لازم أطرح السؤال ده : فين مبدعين مصر ؟ ومحدش يقولى إمكانيات لان كل الناس دى كلها ماكنش عندها إمكانيات نص اللى عندنا دلوقتى ، ومحدش يقول موهبه لأن مش معقول إن المصريين كلهم ال80 مليون معندهومش موهبه ، انا عاوزه اعرف العيب فى إيه أو فى مين وياريت حد يرد عليا .....

1 قول رأيك فى اللى قريته:

ali gamal ali يقول...

الحكاية مش حكاية ظروف او موهبة او امكانيات المشكلة ان احنا فضلنا نسأل بس نسأل عن المشكلة
وكل ما نسأل اكتر كل ما الحل يكبر اكتر واكتر لحد ما بقى مستحيل
مع اننا لو من الاول عملنا حاجة نحل بيها لو جزءكان طلع عندك مليون ام كلثوم
ومليون نجيب