Subscribe Twitter

2010/07/26

الأفراح الشعبيه


عاوزه اتكلم عن الافراح الشعبيه ، وهى عباره عن الافراح اللى بتتعمل فى الشوارع ، من كوشه ودى جى وفرقه ومعازيم ، وبغض النظر عن التلوث السمعى من الأغانى دى واللى بتأذى الناس ، لان الفرح مش بيخلص قبل الساعه 2 بعد منتصف الليل وده طبعا بيسبب ازعاج لكل اللى ساكنين فى الشارع ،

هتكلم عن حاجه تانيه وهى المخدرات والمشروبات المحرمه زى الخمره اللى بقت سمه مميزه لهذا الأفراح ، انا هحكيلكم على موقف شوفته فى احدى الافراح اللى اتعملت فى الشارع اللى ساكنه فيه ، والموقف كان لأب خلى ابنه الطفل الذى لا يتجاوز عمره 4 سنوات ماسك زجاجة خمره وبيشربه منها والاب شاله على كتفه وبيرقص وهو فرحان بيه و زجاجة الخمره فى فم ابنه ، انا مش عارفه فرحان على ايه ؟ ، ياترى هو فاكر انه كده بيعلم طفله الرجوله ؟؟ ، بدل ما بيعلم ابنه آيه من القرآن بيعلمه شرب الخمره ؟؟


بجد الموقف ده استفزنى جدا وكان موقف منفر ومقزز لأقصى درجه ......


ده غير إن الأفراح دى فيها مخدرات واللى بيشربها مش بس شباب لا ورجال كبار فى السن فيهم الأب والجد والشاب وكمان المراهق ، بإختصار يا جماعه الأفراح دى أوكار للفساد ، فيها كل حاجه غلط وكل حاجه حرام

لاحظوا ان فى بنات موجوده بالشارع فى البيوت ، وبنات راجعه من الكليه ، وطبعا رجال سكارى زى دول محدش عارف ايه اللى ممكن يعملوه فى البنات دى !!

وموقف اخر لطفل رضيع أهله طبعا قافلين الشبابيك والبلكونات من رائحة المخدرات ، ولكن الطفل من يوم الفرح ده وهو جاله مرض فى الصدر وحتى الأن فى رحلة علاج ، طب ده ذنب مين ؟


مين يحمى بناتنا وشبابنا واطفالنا ؟

مين يحمى بيوتنا من الاوكار اللى بتتفتح فى الشوارع بدون رقابه دى ؟
وليه مفيش اجراء بيحمينا من الفساد ده ؟
ياريت حد يرد عليا بجد لان الموضوع ده انتشر جدا فى شوارعنا وزاد عن حده

1 قول رأيك فى اللى قريته:

ali gamal ali يقول...

الموضوع جميل
واول مرة الاقي حد خد باله من الموضوع ده
بس مين قال ان مفيش اجرائات لمنع الافراح اللي بالشكل ده
انتي بسهولة جدا ممكن تتصلي بالشرطة وتعملي محضر ازعاج
وطبعا تستحملي عداوة اصحاب الفرح
وبعدبن اللي في القسم ما بيصدقوا ان في فرح زي كدة اتعمل
علشان طبعا يروحوا وياكلوا من الفم الى اليد