Subscribe Twitter

2010/08/20

صنع فى مصر Made In Egypt


حكاية بدأت عندما قررت أنضف الشقه ، ومن غير ضحك ولا تريقه ، فعلا الموضوع بدأ لما كنت بانضف الشقه وبأروق المكتب لقيت حاجه كانت مفاجأه بالنسبه لى جدا وهى انى لقيت حاجه مكتوب عليها صنع فى مصر .. يالهوى انا ماصدقتش نفسي ، وقعدت أقلب فيها وأقرأ كويس اللى مكتوب جايز بيتهيألى ، وإتأكدت إنها صناعه مصريه وفى مصنع مصري كمان .. شوفتوا الهنا اللى انا فيه ، أما عن الحاجه دى بقى ، فكانت علبة بخور ... ايوا بخور .. شوفتوا السعاده اللى انا فيها ؟؟ بقينا بنعرف نعمل بخوووووووور ... هتقولوا عليا هبله لكن بالعكس هو ده العقل بعينه ، اخيرا لقيت حاجه صناعه مصريه فى بيتى ، هتقولولى فى شركات مصريه لأجهزه إلكترونيه ولكنها فى الحقيقه غير مصريه 100 % كل حاجه فيها مستورده والتقفيل مصري ... هتقولولى فى شيبسي و مقرمشات مصريه .. هقولكم فى انواع مكتوب عليها صنع فى مصر وهى مش مصريه زى شيبسي وروتاتو ... إلخ لكن صدقونى البخور ده صناعه مصريه 100 % ، ومن هنا قررت أبحث فى الشقه عن أى حاجه صناعه مصري .. واعرض صورتها هنا سوا ... ومستنياكم تدوروا معايا .... وتورونى إنتاج بلدى

0 قول رأيك فى اللى قريته: