Subscribe Twitter

2011/06/01

كل الكلام إتقال والشعر بقى ماسخ


هشام الجخ قال فى قصيدته :


علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش

حقيقى والله .............

فعلا علمونا بالعصايه ، وبالخوف وبالتهديد ، علمونا نحترمهم بالإجبار ، لكن هما عمرهم ما إحترمونا ، علمونا نخاف ونترعب منهم ، وهما عمرهم ماداقوا طعم الخوف ، علمونا اننا نجرى ورا لقمة عيشتنا ، ويبقى أمل كل شخص أنه يتجوز عشان يخلف ، وبعد ما يخلف يطلع عينه عشان يربى عياله ،

علمونا أن حياتنا فى خطر دايما وإن هما بس اللى قلبهم علينا ،

علمونا أن الدول العربيه مابتحبناش ، دى بتكرهنا وبتغيير مننا ، دول عاوزين مصر تحارب اسرائيل لوحدها وهما يقزقزوا لب ، علمونا العدواه مع دول المغرب العربي بسبب ماتشات الكوره ، كرهونا فى السودان عشان ضربونا هناك ، كرهونا فى حزب الله والشيخ حسن نصر الله ، مع العلم ان نصر الله هو اللى خرج الاحتلال الاسرائيلي من لبنان ، وعلمونا انهم بيكرهوا مصر، كرهونا فى لبنان وكان الرد فى كترمايا واللى حصل فيها للمواطن المصري محمد سليم ،

علمونا ان دول الخليج العربي بتغيير مننا عشان إحنا أحسن منهم ، لكن الحقيقه إن هما اللى بقوا أحسن مننا فى حاجات كتير ، والمصريين هناك بيطلع عينيهم وبيبقى ردهم : إنتوا اساسا بتتهانوا فى بلدكوا !!

علمونا أن قطر بتكرهنا ، وبتغيير مننا ، وعاوزه تبقى أحسن مننا ، وإن قناة الجزيره دى قناة تيت بنت تييت ، وبتكره مصر وبتشتمها .

علمونا أن حماس دى حاجه وحشه ، وماينفعش نساعدهم ولا نفتحلهم معابر ، وأوهمونا أن الظابط المصري اللى مات على الحدود وقت الحرب على غزه مات برصاص فلسطينى ، ولكن بالعقل فرد أعزل مدينته محاصره وتقصف بالطائرات كيف يستطيع التصويب على ظابط مصري ويقتله ؟ ، وهل كان هذا الظابط واقفا منفردا مثلا ؟؟ ، أين باقى الضباط ؟؟ وماذا كان ردهم ؟؟ ، عموما إحنا مش محتاجين نعرف ردهم لان كلنا عارفين مين اللى قتل الظابط المصري دا .........

علمونا إن إيران دى ( كلمة قبيحه ) مايصحش نقولها ولا نتعامل معاها نهائي ، أصل دول ناس عندهم نووى وبيجروا شكل أمريكا ، وكمان بيطبقوا الشريعه الاسلاميه ، يبقى إزاى نعمل معاهم علاقات ؟!

علمونا أن صدام حسين يستاهل اللى جراله لانه ماسمعش كلام مبارك وإنسحب من العراق ، ( على طريقة وأدى جزاء اللى مايسمعش كلمه بابا يقولها ) !!

إتعرض مبارك لمحاولة إغتيال فى أديس بابا فى أثيوبيا ومن يومها وهو مش طايق دول أفريقيا ، ويبقى إحنا كمان لازم نكرهها ، دول ناس بتكرهنا وأخرتها كانت أزمة سد الألفيه الحاليه .

اللى حاولوا يغتالوا مبارك سودانيين ، يبقى لازم نرد ، وكان الرد بإستيلاء مصر على حلايب وشلاتين من السودان ، واللى عملت مشكله بينا وبين السودان

خوفونا من اسرائيل وانها ممكن تتضربنا فى اى وقت ، وممكن تدخل سيناء وممكن تضرب السد العالى ( بعد ما كانت اسرائيل هيا اللى بتخاف مننا ... وعجبي ) .

علمونا ان مبارك رجل الحرب والسلام ، مع أن رجل الحرب والسلام كان السادات ،

علمونا أن اللى مات فى بورسعيد ماكنش ماسك شكوى ، دا كان ماسك سكينه ورايح يقتل الرئيس .

علمونا ان مصر المؤامرت حواليها من كل ناحيه ، من برا ومن جوا ، وان هما قاعدين بيحمونا وبيحموا البلد ، ومش بس من برا مصر ، لا كمان جوه عندنا مسيحين ومسلمين ( وتر كانوا بيشدوه وبيرخوه وقت ماهما عاوزين ) ، وفى بهائيه وفى عبدة شيطان ، وفى تفجيرات ارهابيه ( اللى هما اصلا اللى عاملينها ) .يعنى من الاخر بلدنا كانت عامله زى بنت أموره والشباب البايظ طمعان فيها ،

أما بقية قصيدة هشام كانت بتقول :

بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام

بجد ماتزعلوش ............... أنا خارجه عن النظام

0 قول رأيك فى اللى قريته: