Subscribe Twitter

2023/06/23

مخرج طوارئ

 "مخرج طوارئ"




في فترة عصيبة من حياتي كنت أشعر دوما أنني وحيدة؛ وحيدة جدا. الجميع من حولي نعم ولكني لا أجد من ينصت.. ومن يفهم.. ومن يعتني!

كنت أريد بشدة أن يسمعني أحدهم ويفهمني كما أنا ويستوعب رغباتي وما أشعر به؛ أن يربت أحدهم على كتفاي قائلا: أنا هنا لأجلك..

كنت كل صباح أفتح تطبيق الرسائل الإلكترونية والمسمى بال(ماسنجر) وأرسل فقط رسالة واحدة إلى الجميع ذكورا وإناثا؛ ديباجة واحدة لكلتاهما؛ كلمات قصيرة ومقتضبة لقلب يود أن يحكي الكثير..

" مساء الخير؛ أخبارك إيه؟ ممكن نتكلم شوية لأني مخنوقة؟"

أضغط زر الإرسال للجميع وأنتظر الرد الذي سيمنحني السكينة؛ بعد عدة دقائق كان يجيب أحدهم بكلمات تجبرني على الصمت قائلا: "مساء النور؛ بعتذر مشغول حاليا"

أو تتجاهلني صديقة الطفولة لأياما وأسابيع رغم مشاهدتها للرسالة ثم تجيب بعد سنوات قائلة: " مساء النور؛ اه طبعا احكيلي مخنوقة من ايه؟"

أو يأتيني رد مكون من عدة حروف ورموز متداخلة فأعلم حينها أن هناك طفلا صغيرا يتشبث بهاتف والدته قد قرأ رسالتي وأراد أن يعبر لي بطريقته الخاصة عن دعمه الكامل.


كانت تلك حالتي لأياما وشهورا بل وإمتدت لسنوات؛ تم إجباري على الصمت عمدا ومع سبق الإصرار والترصد؛ فلم أتحمل هواني على الناس و إستجدائي لآذانهم؛ فآثرت الصمت لأضيفه على سابقته الوحدة فأطبقن على روحي كفكي الكماشة ولم أدري أين المفر؟

فأين يفر الإنسان حينما تختنق روحه؟!

أليس هناك مخرج طوارئ بالمنشآت العامة نفر إليه حينما نشعر بالخطر؟! في حالة حدوث حريق مثلا؟!

فأين نفر حينما تحترق نفوسنا؟!

فأين هو مخرج الطوارئ خاصتي الذي أفر إليه حينما أشعر بالخطر والحزن والضيق والتعب والمرض والضعف واليأس؟!


ولا أقصد إساءة الأدب ولكنني كنت أرغب أحيانا في وجود انسان ما يتواجد لأجلي؛ ولأجلي فقط في حالات الطوارئ؛ فأنا لست إمراة تطمع بالكثير. فلا أريد أن أثقل كاهل أحدهم؛ فالحياة ثقيلة ومؤلمة بما يكفي!


وبعد عدة سنوات من الوحدة والصمت؛ وجدت في لحظة مباغتة مخرجا للطوارئ؛ يمكنني أن أفر إليه وقتما أردت؛ يمكنني الحديث والفضفضة كما أريد ولكنني وياللعجب أصبحت مرتبكة!

فسنوات طويلة من الوحدة والصمت تركت وبكل أريحية آثارا في روحي المبعثرة..

فأضحيت لا أتحدث أنا بل أنتظر أن يتحدث إلي أحدهم؛ لا أبدأ محادثة وأرسل رسالة خشية ألا يأتيني رد فأعود لأشعر بمشاعر الوحدة مرة أخرى.

وإذا تحدثت عن شيء ما يزعجني فأعتذر كثيرا عن حديثي ليأتيني الرد: "لا تقولي أسفه"

ولكني أردد الاعتذار خشية من أن يتهمني أحدهم أنني قد أفسدت مزاجه الصباحي؛ أو تسببت في تعطيله عن عمله.


فقد جعلني الصمت أكثر قوه نعم ؛ ولكن جعلتني الوحدة أكثر هشاشة؛ فلا أريد أن أشعر بالألم مرة أخرى؛ أكره شعوري بالتجاهل تماما كما أكره الوحدة!


وهكذا نحن..

نترنح دوما مابين الشعور بالخطر و الفرار إلى مخرج الطوارئ؛ تلك الثواني التي يستغرقها الجهاز العصبي من أجل رد الفعل المنعكس للحفاظ على بقائنا..

كذلك هناك ثواني أخرى تستغرقها أرواحنا من أجل الحفاظ على السلامة النفسية؛ تلك التي نقرر فيها الفرار من الأزمات النفسية بالفضفضة إلى مخرج الطوارئ..!


#إيمان_الشرقاوي

2023/05/25

إكزيما

 #فضفضة




 ليالي حارة من صيف عام ٢٠١٥؛ كنت أعيش حينها في إحدى دول الخليج ولكن بدون مكيف هواء وهذا أمر عظيم لكل من يدرك حرارة الطقس هناك؛ كنت أعاني بشدة نفسيا وجسديا؛ أتصبب عرقا من كل خلية بجسدي؛ معاناة بشعة مع العمل والطهي ورعاية طفلة صغيرة..

 ‏

 ‏ذات يوم أعلن جسدي إعتراضه ببقعة كبيرة ملتهبة على سطح الجلد؛ أخبرني الأطباء وقتها إنها نوع من الإكزيما ووصفوا لي بعض الأدوية والكريمات الطبية.

 ‏

 ‏سألني الطبيب: هل تلك أول إصابة أم حدثت لك من قبل؟

 ‏أجبته على الفور: لم يحدث لي أي أذى سابقا؛ فقط تلك الفترة هي الأكثر ضيقا.

أجابني بكل أسف: إذن ربما تعتادي على الإصابة في تلك البقعة مرة أخرى؛ وعليكي حينها بتكرار العلاج فقط؛ فبمجرد حدوث الإصابة لايحدث شفاء كامل مهما فعلت! 


لم أدرك حينها أن تلك الليالي الحارة سوف تهب نسائمها علي جسدي كل عام في الوقت ذاته؛ يأتي الصيف فيجتر جسدي الذكريات المريرة وتزمجر تلك الإكزيما مرة أخرى في نفس البقعة لتذكرني..

وتعنفني..

ولتخبرني على طريقتها الخاصة؛ 


أن بعض الأذى لا ينسى بسهولة أبدا!


#إيمان_الشرقاوي

2023/05/01

محطات

 أحب ركوب القطارات..

وأهوى تجاوز المحطات..




كثيرا ما كنت أذهب إلى محطة القطار فأحجز تذكرة أو اثنان لأي قطار يقترب موعده؛ وأنتظر تلك الصافرة لتعلن عن مجيئه فأدلف بداخله؛ أبحث عن مكان مقعدي وأختار أن أجلس بجوار النافذة متأملة لتلك الأماكن التي تمضي سريعا أمام عيناي.


اتجاوز المحطة تلو الأخرى؛ يقف القطار لدقائق بإحدى المحطات التي لا تعلم عني شيئا ولن تذكرني؛ ولن يكتب في التاريخ أن إيمان قد مرت من هنا..


لن يتذكرني ركاب القطار؛ ولن يتعرفوا علي أبدا؛ لن يفتقدوا غيابي عندما تأتي محطتي الأخيرة..


لهذا لا أريد لهذا القطار أن يتوقف أبدا؛ فأنا لا أريد الذهاب إلى مكان محدد بعينه؛ لا أريد السكون والصمت.. فقط أريد التجاوز والضوضاء..


ومع ذلك؛ فلكل قطار محطة أخيرة حتما؛ تأتي رغما عنا

حتى وإن تجاوزنا كل شيء؛ فسوف يأتي ذلك الوقت الذي يصمت فيه كل شيء ويتوقف كل شيء..


ولكني أود بشدة إن جاءت محطتي الأخيرة..؛


أن يذكرني أحدهم في قصاصاته إنه إلتقى بي ذات يوم..

وأن تذكرني الأماكن..

2023/01/04

مذكرات الأميرة جاويدان

 ريڤيو مذكرات الأميره چويدان : 👑🙈




لا جهزوا اللب و الفشار عشان هنا سوف أالش قليلااااااا 😂 ... واللى عنده كريز يجهزه عشان هنحتاجه 😅


• هاجمت الاميره چويدان البذخ فى الافراح المصريه ؛ وان المصريين بيصرفوا كتير على الافراح بشكل مبالغ فيه ؛ و حكت عن فرح لبنت باشا معين حضرته بأنهم كانوا بيرموا جنيهات دهب على الضيوف 🙃 و أن المعازيم كانوا بيتسابقوا يلموا جنيهات دهب على شكل خط مستقيم من على الأرض عشان الفآل الحسن 🥲 ( قال يعنى لو لموا زجزاج أو سمبوكسات هيبقي حظهم نحس وكته 😂 )

جس واات ؛ جويدان بقي ماجبتش سيرة فرحها هيا ؛ وانا الحقيقه الفضول هيموتنى اعرف اخبار البذخ فى فرح كونتيسه نمساويه على الخديوى عباس حلمي الثاني هيكون عامل ازاى 😏


• فى نفس حفل الزفاف اللى حضرته جويدان حكت ان زوجة وزير ما فى عهد الخديوي كانت موجوده في الفرح ؛ و راحت لها و قالت لها : أنا معنديش هديه اقدمها لسموك اغلى من ابنى اللى عنده ٥ سنين 🙄 ...

اه وربنا زمبؤلك كده؛ ادتلها ابنها هديه ( علشان جويدان مخلفتش غالبا ) ؛ و جويدان اخدت الطفل فعلا ؛ بس بعد كام يوم فضل يعيط وقال عاوز مامته ؛ و النتيجه أنهم رجعوه لأهله و معاه هدايا كتير ... ( احلى مسح جوخ ده ولا ايه 🥁 )


• فصل كامل فى المذكرات بتهاجم فيه بشراسه ( حلوه شراسه دى 😎 ) نظام الحرملك ( أو الحريم ) ؛ وتقول انه إهانة وان ازاى ده يحصل و يكون مقبول اجتماعيا ؛ و عشان بس متتخضوش ويتهيألكم أنها بتدافع عن المراه وكده .... لالا خالص نيڤير إيڤر لان التويست الحلو بقي 😂 

إن كل اللى مضايقها أن ازاى جاريه ممكن تبقي حامل من الخديوى ولى النعم و يتساوى ابن الجاريه بابن الهانم زوجة الخديوي ؛ و أن المفروض دى طبقه و دول طبقة تانيه خالص ؛ حاجه كده زى الافوكادو والكاكا 🤷


• طول المذكرات بتتكلم عن صحاب الخديوى و الحكام من العيله و عن السلطان عبد الحميد الثانى و عن حاشية الخديوى و الحارس الشخصي بتاعه ؛ بس نسيت حاجه مهمه جدا .... تتكلم عن صحابها هيا 🙄


• مش بس صحابها متكلمتش عنهم ؛ لا ابسلوتلى ؛ دى مجابتش سيرة أهلها ولا قرايبها ولا طفولتها ونشأتها ولا بلدها النمسا ؛ حاجه كده زى مليش لا قريب ولا حبيب ولا غريب بيب بيب .🤷


• الاميره جويدان مكنتش بتقعد فى القصر فى فترة غياب الخديوى لافتتاح اى مكان أو مشروع ؛ كانت بتتنكر فى شكل راجل عشان تقدر تكون جنبه .... لدرجة أن فى مره من المرات اللى اتنكرت فيهم كراجل قابلتها بنت باشا و قالت لها : انت اكتر رجل وسيم شفته في حياتي 😆 ( حطالكم صورتها وهيا متنكره فى الكومنتات 👇 ) 


 

• الاميره جويدان هاجمت كل حاجه ؛ مسابتش حاجه او حد الا ما انتقدته ؛ حتى زوجها نفسه الخديوى عباس حلمي الثاني ؛ و هاجمت نظام الحرملك و قتل الاخ اخوه فى الدوله العثمانيه ؛ وعن وضع المرأه المذري فى الوقت ده ؛ وعن سرقة الجواري ليها .... و مجابتش سيرة اى ايجابيه واحده توحد ربنا 🥲


• من الحاجات اللى وقعتنى ضحك و كنت اول مره اسمع عنها هيا ( حفلة الهروبه ) ايوا ب الهاء مش بالعين 🙈😃 ؛ و دى كانت حفلة بتتعمل للعريس اللى قدر يهرب من مراته يوم الصباحيه 😆😂 ؛ و بيفضل طول اليوم مع أصحابه فى الحفله و يرجع البيت باليل فى زفه بالمزيكا و الورود ... وحاجه اخر للخلف در يا متهم خالص 😁 


• من العادات ال werid اللى قالتها جويدان زى حكاية حفلة الهروبه ؛ أن العروسه ممنوع تخرج من بيتها قبل ٤٠ يوم ؛ و البنت اللى عدت ١٤ سنه من غير جواز يبقي فاتها القطر 🥱 ؛ وان العروسه لازم تقدم صينية عليها فناجين القهوة ل ام العريس و قرايبه ؛ و العروسه تعجبهم لو وش القهوه فضل زى ماهو ؛ وان زفة العروسة تمشي ناحية اليمين ؛ حتى لو بيت الزواج في اتجاه الشمال ؛ الزفه لازم تمشي يمين 🤚 ؛ و فى اليوم السابع للزواج ؛ العروسه تستقبل صحابها واهلها و تعملهم اكل و حلقة ذكر وميمشوش من عندها غير بالليل 🤓 


• بتقول انها كانت بتحب تهزر و تلعب مع الخديوى ألعاب عامة الشعب ( اه و ربنا قالتها كده فى الكتاب ) بس ياتري ايه هيا العاب العامه ؟ 🤔 


١- شرب القهوه بصوت عالى..... شوووووووو ( ايوا زى ما حضرتك عملت كده بالظبط ) 


٢- "لامؤاخذه" كانوا بيتفوا بذرة الكريز من بلكونة القصر للجنينه و يشوفوا مين "لامؤاخذه تانى" تفها ابعد من التانى ( على أساس ان عامة الشعب بياكلوا كريز وكته 😂😂) 


و جويدان بتقول أن حراس القصر كانوا بيندهشوا من التصرفات دى .... ( حضرتك ده احنا هنندهش ونجيب ناس تندهش معانا عشان تبقي حفلة اندهاش جماعى 🙄) .


• بتقول كمان أن محلات الازياء الفرنسيه اللى كانت بتشتري منهم لبسها كانوا بيكتبوا الفواتير بخط صغير عشان الخديوى ميعرفش يقرأ المبلغ فيتصدم أو يجيله شوجر ولا حاجه ؛ وهنا سأسكت قليلااااااااا ؛ طب مكنش بيقرا الفواتير ... مكنش بيعرف هو دفع كام ؟ 🤔


 هتلاقوا هنا ريفيوهات للمذكرات على هيئة حلقات لكل فصل بالتفصيل وحتى نلتقي فى ريڤيوهات قادمه 💁 ومتنسوش تاخدوا لفه في التعليقات 😂 : 


https://www.facebook.com/112522095452694/posts/3621537231217812/


#إيمان_الشرقاوى

2022/12/25

Harry & Meghan

 Harry & Meghan

#Review



*******

• كالعادة نتفليكس بتبهرنا بعمل جديد متعوب عليه ؛ ٦ حلقات وكل حلقة ساعة ؛ يعنى حوالى ٦ ساعات من الإتقان والاجتهاد والاحترافية في التنفيذ .


*********

• معرفش هل هيا صدفة ولا مقصودة أن توقيت عرض الحلقات يكون بعد حوالى شهر من عرض الجزء الخامس من The crown ؛ طبعا الجزء الخامس ده هو اللى بيتطرق لمعاناة ديانا من علاقة تشارلز بكاميلا و انفصالهم وطلاقهم .


 و توقيت اذاعة الوثائقي هو نفس وقت زيارة ويليام و كيت ل امريkا !


**********


• الحلقات إسمها هارى أند ميجان ؛ رغم أنها المفروض تتسمى ميجان أند هاري 😀 ... ؛ لأن كل الوثائقي عن معاناة ووجع و ألم ست أم آرتشي 🤚🥁


*********


• استخدم هاري تعبير "المؤسسة الملكية " للحديث عن أسرته ؛ ومقالش أبدا My Family ؛ وكان اللى بيقوله عنها كلمات زى : 

المؤسسة تريد (تدميرنا) ؛ (خطر) على مستقبنا ؛ (تؤذي) اسرتي ؛ (إساءة) لميجان .

وان ده مبررهم للخروج منهم ...


*********


"لم يسمحوا لنا بسرد قصتنا" 


• قالوا كده عن القصر الملكي؛ أما عن مبررهم للحديث فى الحلقات وهو أنهم بقالهم سنين ناس بتتكلم عنهم وعن قصتهم وان جه الوقت أن قصتهم تتسمع منهم هما وعلى لسانهم ( على الرغم أنهم سبق واتكلموا بلسانهم مع اوبرا وينفري ؛ بس مش مشكله نعديهالهم عشان خاطر عيون ديانا ) .

 وأفراد الاسره رفضوا التعليق على الحلقات ( ده تنويه انكتب فى بداية اول حلقة ) ؛ وبعد عرض الحلقات خرج تصريح أن الحلقات جعلت كايت ميدلتون تشعر بالخيانة ..


*********


• لك أن تتخيل يا مؤمن أن الصوره اللى كانت السبب أن هاري يحب ميجان كانت صورتها بفلتر سناب شات بودان ومناخير كلب ... ( القلب لما يعشق 💘) 


*********


• خدي بالك يا ست الكل إن أول ميعاد بين هاري وميجان؛ هاري اتاخر عليها نص ساعه ؛ فبلاش تتقمصي لو إتاخر عليكي و إعتبريها علامة يا مارد 😂🤚


*******


• "ضحت بحريتها لتكون زوجتى وتنضم إلى عالمي واليوم أنا أضحي كي اكون في عالمها "


الحقيقة أنا وقفت كتير اودام الجملة دي واللى اتقالت على لسان هاري عن ميجان ؛ ميجان مكنتش سوبر ستار ولا واخده اوسكار ولا عروض التمثيل مع أعظم المخرجين نازله ترف عليها ... لا لا خالص ده حتى يمكن اشهر عمل ليها هو suits وبس ؛ وهاري هو الأمير المشهور اللى من عيله كبيرة ؛ لكن عشان بيحبها شاف أنها توافق على الزواج منه حاجة كبيرة اوى فى نظره ؛ وأنها ( ضحت بحريتها ) فى مقابل أنها بس تكون مراته ..😌


ملحوظة : ( جريس كيلي كانت بتمثل مع هيتشكوك وخدت الاوسكار واتجوزت امير موناكو ومع ذلك الأمير رينيه مقالش عنها زي ما هاري قال عن ميجان ) 


**********


• "يريدان أن يجمعهما شيئا ما" 


جملة اتقالت فى وصف علاقة هاري وميجان فى بدايتها على لسان المقربين منهم ؛ وهيا فعلا احسن وصف ممكن يتقال عن أي اتنين بيحبوا بعض .❤️ 


*********


• عجبنى اوي أن هاري لما عرف أن الصحافه هتنشر بكرة خبر علاقتهم ببعض ؛ قال لميجان يلا نستمتع بخروجة دلوقتي لأنها هتكون أخر خروجة لينا من غير ما يكون ورانا مصوريين و صحفيين ...


*********


• "اعدك أن احافظ على سلامتك" 


ده الوعد اللى قاله هاري فى بداية علاقته بميجان ؛ مش انه يفضل يحبها ؛ ولا انه يفضل جنبها ؛ ولا أنه ميزعلهاش ... لالالا ؛ وعدها أنه يحافظ على سلامتها ! و ده معناه أنه عارف ومتأكد أن فى أذي اتعرضت له والدته و ده هيودينا للنقطة الجايه .


*******


• "امي اتخذت جميع قراراتها من قلبها ... وأنا ابن أمي "


" ليس لدي ذكريات كثيرة معها ولكننى اتذكر دوما ضحكتها المبهجه"


"تعرضت امى للمضايقه طوال حياتها مع والدي"


"لقد رأيت وشاهدت معاناة النساء اللاتى تزوجن من هذه المؤسسه"


"ميجان لديها صفات كثيرة تذكرني بأمي"


"الأشياء التى حدثت لامى بدأت تحدث لي ؛ لما لا تتركوني و شأني فحسب ؟ " 


"لم أرغب في أن يعيد التاريخ نفسه"


دي كانت مقتطفات من أقوال هاري فى الوثائقي ؛ هو بإختصار عاش و شاف نهاية أمه وهيا شافت وعاشت انفصال امها وابوها والأذي اللى حصلها منهم حتى لما كبرت ؛ زي اختها اللى خرجت تهاجمها فى الجرائد أو ابوها اللى تخلي عن أنه يحضر فرح بنته الملكي ويوصلها لعريسها الأمير و إختار أنه يبيع كام صوره بمبلغ كبير للجرائد الصفرا ...

ميجان عاشت حياتها تتمنى تبقي مشهورة ( زي ما كتبت كده فى دفتر مدرستها ) و هاري عاش طول حياته يكره أنه مشهور ... 


واختاروا الاتنين فى النهاية الخروج من المؤسسة بما أنهم كده كده مشهورين والصحافة والإعلام هيجروا وراهم مهما حصل ...

المشكله أن هاري نسي أن كلام والدته مع الصحافة للدفاع عن نفسها آذاها هيا قبل أى حد و كمان نسي أن خروج ديانا من المؤسسه كان نهايتها ! 

مش بس ديانا ... أى حد إنشق عن الأسرة الملكية فى إنجلترا أو فى أي بلد فى العالم كانت حياته ونهايته تعيسة ولنا في فتحية ورياض غالي عبرة لمن يعتبر 🤚


*********


• هاري هيعمل كتاب يوم ١٠ يناير عشان يقول فيه اللى نسي يقوله فى الوثائقي ؛ واللى عملوه عشان لو نسيوا يقولوا حاجه مع أوبرا وينفري ... 

ما خلاص يا هاري ده أنت مظلوم جدا 😂 


********

• وبعدين ايه يوميات حياتهم اللى متصوره فيديوهات دى ؟ يعنى ده تليفزيون الواقع ولا هما متعاقدين من سنين على نشر قصة حياتهم ولا ايه بالظبط 😂


********


• "فاتتهم فرصة كبيرة وهو وجود زوجتي"


دى جملة قالها هاري عن عيلته... وانا بعيد عنكم سمعتها من هنا وحسيت بتمنيل في دراعي فجأة والدنيا لفت بيا لفتين كده 😂😂 


*********


• طيارة هيلكوبتر ايه اللى فيها صحفيين بيراقبوهم مرتين كل يوم عشان يطلعوا بصوره فى الآخر ؟؟ هيا الصحافة الصفرا عندكم عندها طيارات ؟ 🙄 


********


• في رأيي أن ميجان وكل عيلتها مكنوش مصدقين أنها مرتبطة ب هاري ؛ والموضوع بالنسبه لهم كان خيالي وعمرهم ما تخيلوا أن الأمير هيرتبط ببنتهم ؛ والحقيقه أنه ارتبط فعلا وميجان راحت للعيلة المالكة برجليها واتعرفت على الملكة وعلى ويليام وكيت وتشارلز وكاميلا وغيرهم لحد ما الجوازة تمت ... ليه بقي مش عاجبها لا عاداتهم ولا تقاليدهم ولا لبسهم ولا طريقة كلامهم ولا اسلوب حياتهم. 

طب يا بنتي ما كنتي تقولي من الأول زي اى واحده ارتبط بيها هاري قبلك و رفضت تكمل للسبب ده ؟؟ بتقرفينا وتقرفي البشريه معاكي ليه يا ست أم آرتشي ؟ 😀


***********


• أنا شايفه أن هاري أمير و محبوب و إبن الملك وهيبقي أخو ملك وعيلته كبيرة اوى ؛ فى المقابل عندنا ميجان غير مشهورة ومن أسرة مفككة ؛ فأنا إتوقعت انها تشوف فى أسرة هاري تعويض عن حاجات كان نفسها تعيشها و تتأقلم معاهم ؛ لكن الغريب والتوكسيك هو قطع العلاقات اللى حصل بين هاري وأخوه الوحيد ويليام ! 

وناخد فى اعتبارنا أن ويليام ابن ديانا برضه يعنى مش اخ غير شقيق مثلا ... لا ؛ ده شاف و عاش كل اللى هاري حكاه عن ديانا وعن الأذي والوجع بس مطلعش يتشحتف ولا يتنحنح ونينينينيييي 🙃


*******


• هل من المعقول أن واحده ابنها اتشتم فى كاريكاتير مجلة ما فى انجلترا ؛ فتقوم تعمل وثائقي على منصة عالميه تعرض فيه الكاريكاتير عشان اللى ميعرفش يعرف ؟؟

( بتكلم عن آرتشي ابن ميجان واللى اترسم فى كاريكاتير أنه شمبانزى) ! 


********

• " كان عليهم قول الأكاذيب من أجل تلميع صورة أخي ؛ ولم يقولا الحقيقة للدفاع عنا ..."


اظن باختصار شديد الفرق بين ويليام وهاري زى بالظبط الفرق بين اليزابيث و مارجريت؛ أو الفرق بين جورج السادس و إدوارد الثامن ؛ حكاية الاتنين اخوات وجهي العملة؛ الواجب و الحرية ؛ العقل والقلب ؛ العرش و الحب !


*********


• تكرار جملة هاري طول الوثائقي أنه دلوقتي سعيد ؛ دلوقتي حاسس بالسعادة والراحة ... فكرني بمشهد المريض النفسي اللى دخل على عبد المنعم مدبولي العيادة وفضل يردد : " أنا مش قصير قوزعه أنا طويل و أهبل " ! 


اصل يا جماعه literally المبسوط بيبان عليه ؛ والفرحان مش محتاج يقول إنه فرحان ؛ و اللى يحب يبان فى عينيه ❤️


*********


• من كوكب آخر.. 😃 ف أنا عجبني جدا فكرة أنهم كانوا بياخدوا في المدرسة واجب يكتبوا شعر عن مشاعرهم ... وعجبنى اكتر شعر ميجان عن حياتها بعد انفصال والدها ووالدتها ؛ وهنقله ليكم زي ماهو : 


Two coaches where I lay, two places where I stay. Moving, moving here and there, from Monday to Friday, I'm everywhere. 


Don't get me wrong, it's not that bad but often times it makes me sad. I want to live that nuclear life with a happy dad and his loving wife.


'A picket fence, a shaggy dog, a fireplace with a burning log. But it's not real, it's just a dream, I cannot cry or even scream. 


'So here I sit with cat number three, life would be easy if there were two of me.'


**********

• وفي النهاية احب اتقمص دور أستاذة ريهام حواجب و أقول : إنتى السبب يا ميجان فى كل اللى حصل وكل اللى هيحصل 🤚

و إنجزي بقى يا ميجان and show your true colors


#إيمان_الشرقاوى